جوزى قالى ان خالته جايه من الصعيد تقعد عندنا كام يوم ….وبما ان حماتى متوفيه

جوزى قالى ان خالته جايه من الصعيد تقعد عندنا كام يوم وبما ان حماتى متوفيه هتقعد عندى
جهزت لها الاوضه بس هى صممت انها تقعد فى شقه الضيوف تحت
اصل البيت كله ملك جوزى لانه كان وحيد أبوه وامه
فااحنا عاملين الدور الاول للضيوف وشقه حماتى الله يرحمها فى الدور التانى وشقتى انا فى الثالث 
جت بليل قعدت معانا شويه وبعد كده نزلت علشان تنام الغريبه انى ما شفتش وشها طول مانا قاعده 

لانها منتقبه وما رفعتش النقاب طول الوقت خالص حتى عنيها مش باينه ولابسها كله اسود
يعنى عبايه سودا وخمار اسود ونقاب اسود وجونت اسود وفى حاجه شفافه على عنيها مغطيه عنيها كمان 
وما اتكلمتش طول القعده كانت بتهز رأسها وبس
عرفت من جوزى ان زورها ۏجعها ومش قادرة تتكلم 
جوزى بليل بعد هى ما نزلت قالى اجهز الغدا بكرا فى شقه حماتى لانها عايزه تقضي اليوم فى شقه اختها 
بعد جوزى ما نام قولت انزل الخضار والحاجه تحت فى الشقه واجهز الا اقدر عليه علشان بكرة يبقي الباقي سهل
لانى هعمل ماحشي 
المهم خد الحاجه ونزلت تحت الشقه ولسه بفتح الباب سمعت حركه جوا قولت اكيد بيتهيألى انا حماتى وحمايا ميتين
وانا مجهزه شقه الضيوف لخالة جوزى ونزلت معاها لحد تحت وهى نازلة تنام وجوزى نايم يبقي اكيد انا بيتهيألى 
سميت الله ودخلت ببص لقيت اوضه المرحومه حماتى بتتفتح وحماتى خارجه منها 
نفس الجلبيه الا كانت بتنام فيها ديما نفس الشبشب حتى نفس الشكل لقيتها بتبرقلى وبتقولى انتى ايه جابك هنا دلوقتى 
احييييه حتى نفس صوت حماتى بس فى بحه فى صوتها حتى صوتها مرعب اكتر انا اتخشبت وبرقت وقعد اصوت وخرجت جرى